CMC-19

Vinsamlegast skráið þátttöku hér

Dagskrá ráðstefnunnar

Ráðstefnan markar útgáfu bókarinnar "Nordic Crisis Management: Well-Performing Governance During COVID-19", sem Ásthildur Elva Bernharðsdóttir, prófessor við Háskólann á Bifröst, og Baldur Þórhallsson, prófessor við Háskóla Íslands, ritstýra. Í bókinni er í fyrsta sinn gerður kerfisbundin samanburður og greining á því hvernig Norðurlöndin fimm, ásamt Grænlandi og Færeyjum, brugðust við COVID-19 faraldrinum. Litið verður til þess hvaða lærdóm megi draga af þessari reynslu, hvernig hún nýtist við stjórnun næstu áfalla og hvort norrænir stjórnarhættir búi nægilega vel í haginn fyrir næstu áföll í síbreytilegum og óvissum heimi.

Á ráðstefnunni koma saman fræðimenn frá öllum Norðurlöndunum sem tekið hafa þátt í rannsóknarverkefninu "Áfallastjórnun í COVID-19 faraldrinum: Stjórnarhættir og leiðtogahæfni". Í verkefninu hefur verið rannsakað hvernig stærð stjórnsýslu, stjórnskipulag og stofnanaleg uppbygging, ásamt menningu, mótuðu áfallastjórnun í COVID-19 faraldrinum.

Þetta rannsóknarverkefni leiddi saman norræna fræðimenn á sviði áfallastjórnunar sem greindu og lögðu mat á stefnumótun og viðbrögð Íslands, Grænlands, Noregs, Svíþjóðar, Færeyja, Finnlands og Danmerkur við COVID-19 faraldrinum og deila reynslu og góðum starfsháttum milli landanna. Markmið verkefnisins er að styrkja viðnámsþrótt og samhæfingargetu innan og milli Norðurlandanna þegar kemur að áfallastjórnun.

Samstarfshópurinn beitti alþjóðlegum rannsóknaramma sem hentar sérstaklega til að greina ákvarðanatöku og stefnumótun í áfallastjórnun við erfiðar aðstæður. Norðurlöndin eru ólík að stærð og sem býður uppá tækifæri til að rannsaka og meta að hvaða leyti stærð stjórnsýsla og stjórnkerfa ríkjanna hefur áhrif á viðbrögð þeirra við áföllum. Rannsóknir sýna að það er grundvallarmunur á virkni og starfsemi stjórnsýslu í litlum og stórum ríkjum – munur sem hefur fram til þessa lítið sem ekkert verið rannsakaður með tilliti til áfallastjórnunar. Ólíkar nálganir Norðurlandanna við faraldrinum – landa sem eru menningar- og stjórnarfarslega mjög svipuð – býr til einstakan vettvang til að rannsaka þær áfallstjórnunaraðferðir sem ríkin beittu og árangur þeirra.