Frá þekkingu til áhrifa er yfirskrift fundarraðar sem varpar ljósi á áhrifin af starfi GRÓ skólanna sem starfræktir eru á vegum GRÓ – Þekkingarmiðstöðvar þróunarsamvinnu, á sviðum þar sem Ísland hefur sérþekkingu. Fundarröðin er á vegum Alþjóðamálastofnunar Háskóla Íslands, Utanríkisráðuneytisins og GRÓ - þekkingarmiðstöðvar um þróunarsamvinnu en hún hófst 5. nóvember s.l. með fundi sem varpaði ljósi á Jarðhitaskólann (GRÓ - GTP), þessi fundur um Sjávarútvegsskólann (GRÓ-TFP) er því annar í röðinni.

Sjávarútvegsskólinn var stofnaður árið 1998 með það að markmiði að efla getu í sjávarútvegi með fræðslu, menntun, rannsóknum og miðlun þekkingar til sérfræðinga í samstarfslöndum.

Hvaða vísbendingar má sjá um sjálfbæra þróun í sjávarútvegi í samstarfslöndum GRÓ FTP? Hvernig hafa þátttakendur nýtt sér þekkingu og reynslu frá sex mánaða námi sínu á Íslandi til að hafa jákvæð áhrif heima fyrir?

Á þessum opna fundi fengum við svör við spurningum sem þessum og heyrðum frá nemendum sem miðluðu reynslu sinni og sýn á sjálfbærni í sjávarútvegi og af Sjávarútvegsskólanum.

Fram komu:

Dr. Áslaug Ásgeirsdóttir, Rektor Háskólans á Akureyri, bauð gesti velkomna og Þorgerður Katrín Gunnarsdóttir, Utanríkisráðherra, flutti opnunarerindi. Þá flutti Dr. Anthony Taabu-Munyaho, forstöðumaður IBLuES, fyrrum forstöðumaður NaFIRRI and Lake Victoria Fisheries Organization og fyrrum nemi sjávarútvegsskólans, meginerindi um reynslu frá heimalandi sínu. Í kjölfarið var spilað myndskeið þar sem innsýn var gefin í reynslu fleiri nemenda víða að úr heiminum. Að því loknu hófust pallborðsumræður. Pallborðinu stýrði Þór Heiðar Ásgeirsson, Forstöðumaður Sjávarútvegsskólans - GRÓ-FTP og pallborðið skipuðu Dr. Olanrewaju Femi Olagunju, nemandi GRÓ FTP 2019 (Nígeria), Annakay Tishana Crawford, núverandi GRÓ FTP nemi (Jamaíka) and Solomon Haeremai núverandi GRÓ FTP nemi (Papúa Nýja-Gínea). Fundinum lokaði Nína Björk Jónsdóttir, forstöðumaður GRÓ, þekkingarmiðstöðvar þróunarsamvinnu.

Næstu fundir í fundarröðinni fara fram þann 3. mars, þar sem fjallað verður um störf Jafnréttisskólans, GRÓ-GEST og 7. maí þar sem fjallað verður um störf Landgræðsluskólans, GRÓ-LRT.

Nemendahópur GRÓ-FTP