Hafísinn við Ísland: Áhrif hans fyrr á tímum, rannsóknir og framtíðarhorfur

Vísindi á norðurslóðum

 

Fyrirlestraröð á vegum Rannsóknaseturs um norðurslóðir við Háskóla Íslands veturinn 2019-2020

Málefni norðurslóða hafa í vaxandi mæli ratað í umræðuna á undanförnum misserum. Áhrif loftslagsbreytinga eru víðtæk og hitamet falla sem hefur mikil áhrif á bæði umhverfið og allt líf á norðurslóðum. 

Við Háskóla Íslands leggur fjöldi fræðimanna stund á rannsóknir sem tengjast norðurslóðum. Markmið þessarar fyrirlestraraðar er annars vegar að kynna þá fjölbreyttu flóru rannsókna við háskólann sem lúta að norðurslóðum og hinsvegar að efla opinbera umræðu um þær áskoranir sem við stöndum frammi fyrir og leita góðra leiða til að takast á við þær.

 

5. september frá kl. 12:00 – 13:00 í fyrirlestrarsal Þjóðarbókhlöðunnar,

Arngrímsgötu 3, 107 Reykjavík

Ingibjörg Jónsdóttir, dósent við Jarðvísindadeild

 

Hafísinn við Ísland: Áhrif hans fyrr á tímum, rannsóknir og framtíðarhorfur.

 

Í erindinu verður fjallað um hafísinn við Ísland út frá ýmsum sjónarhornum og rætt verður um rannsóknaáherslur og framtíðarhorfur. Hafíssagan er samofin sögu þjóðarinnar. Í miklum hafísárum gat ísinn hindrað fiskveiðar og aðflutninga sjóleiðis, haft slæm áhrif á landbúnað og þar með afkomu þjóðarinnar. Ítarlegar sögulegar heimildir eru til um hafísinn og geta þær m.a. varpað ljósi á veðurfar. Nú á tímum hentar fjarkönnun einkar vel til að rannsaka myndun, rek og útbreiðslu hafíss og gervitunglavöktun hefur verið stunduð um árabil, m.a. til að auka öryggi sjófarenda. Miklar breytingar hafa orðið á hafísþekjunni á norðurslóðum og eru þær vissulega áhyggjuefni á tímum hnattrænna breytinga.

Ingibjörg stundaði nám við Háskóla Íslands og Cambridge-háskóla í Bretlandi, en aflaði auk þess hafísgagna í Noregi, Danmörku og Bandaríkjunum. Hún hefur stundað hafísrannsóknir um árabil og farið í nokkra hafísleiðangra um Grænlandshaf og Norður-Íshafið.
 
Fundarstjóri: Margrét Cela, verkefnastjóri við Rannsóknasetur um norðurslóðir