HÖFÐI Friðarsetur Reykjavíkurborgar og Háskóla Íslands

Þann 7. október næstkomandi hefst starfsemi HÖFÐA Friðarseturs Reykjavíkurborgar og Háskóla Íslands með opnu málþingi í Hátíðasal Háskóla Íslands. Málþingið hefst kl. 13:00 með opnunarávarpi Guðna Th. Jóhannessonar, forseta Íslands, og stendur til kl. 17:30.

Aðalræðumenn eru Steve Killelea, stofnandi og stjórnarformaður Institute for Economics and Peace og höfundur Global Peace Index og Annika Bergman Rosamond, dósent í stjórnmálafræði við Háskólann í Lundi.  Auk þeirra munu Jón Atli Benediktsson, rektor Háskóla Íslands, Lilja Alfreðsdóttir, utanríkisráðherra og Dagur B. Eggertsson, borgarstjóri Reykjavíkur ávarpa málþingið.

Meðal annarra þátttakenda eru Michele Acuto, prófessor í alþjóðasamskiptum og þéttbýliskenningum við University College í London, Melanie Greenberg, forstöðumaður Alliance for Peacebuilding, hinn margrómaði leikstjóri Darren Aronofsky og sýrlenska útvarps- og heimildamyndagerðarkonan Obaidah Zytoon.

Alþjóðleg kvikmyndahátíð í Reykjavík, RIFF, stendur að fyrri pallborðsumræðum málþingsins í samstarfi við HÖFÐA Friðarsetur þar sem fjallað verður um áhrifamátt miðlunar og hvernig nýta megi mátt kvikmyndarinnar til þess að hafa áhrif á friðarhorfur í heiminum í dag. Í síðari pallborðsumræðum verður sjónum beint að auknu mikilvægi borga á alþjóðavettvangi og hvaða hlutverki borgarar geta gegnt í friðarmálum.

HÖFÐI Friðarsetur er samstarfsverkefni Reykjavíkurborgar og Háskóla Íslands og er vettvangur fyrir þverfaglegt og alþjóðlegt samstarf með áherslu á hlutverk borga, smáríkja og almennra borgara í að stuðla að friði, friðarmenningu, afvopnun og friðarfræðslu.

Hér má nálgast dagskrá opnunarmálþings HÖFÐA Friðarseturs.

Facebook-síða HÖFÐA Friðarseturs www.facebook.com/ReykjavikPeaceCentre/

Vefur HÖFÐA Friðarseturs – www.fridarsetur.is – verður formlega opnaður þann 7. október 2016.