Menntun og fjölmenning

Alþjóðamálastofnun hefur komið að skipulagningu nýrrar fundaraðar Háskóla Íslands sem ber yfirskriftina Fræði og fjölmenning. Fundaröðin hófst á opnum fundi um þátt stjórnmála og fjölmiðla í umræðum um fjölmenningu og fjölbreytileika 25. nóvember sl. Næstkomandi fimmtudag, á Alþjóðlega mannréttindadaginn 10. desember, fer annar fundurinn í fundaröðinni fram en þá verður sjónum beint að menntun í fjölmenningarsamfélagi. Fundurinn verður haldinn kl. 12.00 til 13.15 í fundarsal Þjóðminjasafns Íslands og er öllum opinn.

Við þróun fjölmenningarsamfélags er mikilvægt að huga sérstaklega að börnum og ungu fólki. Á Íslandi hefur nú þegar skapast töluverð reynsla af skóla margbreytileikans og þekking með rannsóknum á því sviði menntavísinda. Á fundinum verður athygli einkum beint að börnum og ungmennum af erlendum uppruna í íslensku menntakerfi.

Dagskrá

Jón Atli Benediktsson, rektor Háskóla Íslands, setur fundinn.

Hanna Ragnarsdóttir, prófessor í fjölmenningarfræði við Menntavísindasvið Háskóla Íslands, fjallar um hvers konar umgjörð íslensk menntastefna, lög og námskrár mynda fyrir fjölbreytta nemendahópa, einkum börn af erlendum uppruna

Dagur B. Eggertsson borgarstjóri segir frá nýrri fjölmenningarstefnu fyrir skóla- og frístundastarf, Heimurinn er hér, sem tók gildi í Reykjavík á síðasta ári. Stefnan tekur til alls lærdómsumhverfis barna og ungmenna með tilliti til fjölmenningar. Þar er haft að leiðarljósi að öll börn nái árangri í námi og leik, standi vel að vígi félagslega og fái tækifæri til að vera stolt af bakgrunni sínum og menningu.

Kristrún Sigurjónsdóttir, deildarstjóri móttökudeildar Lækjarskóla í Hafnarfirði, fjallar um reynslu Lækjarskóla af því að taka á móti börnum af erlendum uppruna og hvernig sú reynsla hefur og mun nýtast við móttöku flóttabarna og barna hælisleitenda.

Að fundi loknum verður boðið upp á hressingu.