Opinn síðdegisfyrirlestur: Samspil menningar og áfallastjórnunar

Stofnun stjórnsýslufræða og stjórnmála og Alþjóðamálastofnun Háskóla Íslands standa fyrir opnum síðdegisfundi fimmtudaginn 12. nóvember 2015, kl. 17:00 – 18:00, í stofu 101 í Odda, þar sem Ásthildur Elva Bernharðsdóttir mun kynna nýútkomna bók sína undir yfirskriftinni:

Samspil menningar og áfallastjórnunar:
Hvaða áhrif hafa menningarsjónarmið á hegðun stjórnenda í viðbúnaði og viðbrögðum vegna áfalla?

 

Að erindi hennar loknu verður tími fyrir umræður, en fundarstjóri verður Gunnar Helgi Kristinsson, prófessor við Stjórnmálafræðideild HÍ.

Háskóli ÍslandsBókaforlagið Springer hefur gefið út bókina Crisis-Related Decision-Making and the Influence of Culture on the Behavior of Decision Makers eftir Ásthildi Elvu Bernharðsdóttur. Efni bókarinnar byggir á doktorsrannsókn höfundar sem hún varði frá Stjórnmálafræðideild Háskóla Íslands. Í rannsókn var spurt hvort og hvernig greina megi áhrif menningar í viðbúnaði og viðbrögðum vegna áfalla. Gögn voru sótt í gagnabanka á vegum Moynihan Institut of Global Affairs í Maxwell School, Syracuse University sem geymir tilviksrannsóknir á áfallastjórnun vegna ólíkra áfalla sem átt hafa sér stað í fjölda ríkja. Áföllin spanna vítt svið, frá efnahags- og pólitískum áföllum til náttúruhamfara, heilsufaraldra og hryðjuverka svo nokkur séu nefnd. Leitast var við að greina hegðunarmynstur áfallastjórnenda á kerfisbundinn hátt og máta við hegðunarmynstur sem vænta má að fylgi mismunandi menningarsjónarmiðum undir fjórum þemum áfallastjórnunar: áhættuminnkandi aðgerðir, áfallastjórnendur/tegund ákvarðendahóps, upplýsingastjórnun og lærdómur.

 

Háskóli Íslands

Ásthildur Elva Bernharðsdóttir er cand. oecon frá Viðskiptafræðideild HÍ og doktor frá Stjórnmaálafræðideild HÍ. Hún hefur starfað við rannsóknir og kennslu við Jarðskjálftamiðstöð HÍ á Selfossi, er fyrrverandi forstöðumaður Alþjóðamálastofnunar Háskóla Íslands og Smáríkjaseturs og var fyrsti framkvæmdastjóri Gæðastjórnunar Íslands, nú Stjórnvísi. Ásthildur hefur stundað rannsóknir í Svíþjóð og Bandaríkjunum, kennt áfallastjórnun og leiðbeint nemendum bæði hér heima og við háskólann í Syracuse. Hún hefur gefið út efni um áfallastjórnun, komið saman hópi fræðimanna til rannsókna á áfallastjórnun á Íslandi og tók einnig þátt í þróun áætlana fyrir sveitarfélög er varða viðbúnað, viðbrögð og uppbyggingu vegna samfélagslegra áfalla.