Alþjóðamálastofnun og Reykjavíkurborg í samstarf um stofnun friðarseturs

Skrifað var undir samstarfssamning Reykjavíkurborgar og Háskóla Íslands í Höfða í morgun (7. janúar) um undirbúning stofnunar friðarseturs. Setrinu er ætlað að taka til starfa haustið 2015 og verður hýst innan Alþjóðamálastofnunar Háskóla Íslands.

Dagur B. Eggertsson, borgarstjóri, og Kristín Ingólfsdóttir, rektor Háskóla Íslands, skrifuðu undir samninginn að viðstaddri ráðgjafanefnd tilvonandi seturs en hana skipa Jón Gnarr (formaður), Silja Bára Ómarsdóttir (f.h. Háskóla Íslands) og Svanhildur Konráðsdóttir (f.h. Reykjavíkurborgar).

Markmið friðarseturs er að styrkja Reykjavík sem borg friðar og vera til ráðgjafar um hvernig Reykjavík geti unnið að friði hér heima og að heiman. Með starfi friðarseturs verði stuðlað að uppbyggilegum samskiptum, minnkandi ofbeldi og friðsamlegum samskiptum ríkja og alþjóðastofnana.

Þá verði unnið að því að auka almennt þekkingu á því hvernig megi stuðla að friði með fræðslu og stuðningi við rannsóknir. Friðarsetur verði þannig vettvangur fyrir þverfaglegt og alþjóðlegt samstarf, skipulag viðburða, ráðgjöf og fræðslu á sviði friðarmála, með áherslu á hlutverk borga og smáríkja við að stuðla að friði, friðarmenningu, afvopnun og friðarfræðslu.

Dagur B. Eggertsson, borgarstjóri, sagði mikil tækifæri felast í samstarfi Reykjavíkurborgar og Háskóla Íslands í þágu friðar. Kristín Ingólfsdóttir, rektor Háskóla Íslands tók í sama streng og sagði að með sameiningu krafta gætu góðir hlutir gerst sem hefðu áhrif til framtíðar.