Norræn samvinna um borgaralegt öryggi – opinn morgunfundur

Opinn fundur á vegum Alþjóðamálastofnunar og Rannsóknaseturs um smáríki við Háskóla Íslands í samvinnu við Norræna húsið

Mánudaginn 24. nóvember kl. 9:00-10:30 í Norræna húsinu

Norræn samvinna um borgaralegt öryggi: Hvað er að gerast? 

Í apríl 2009 hittust fulltrúar Norðurlandanna fimm í Haga höllinni nálægt Stokkhólmi til að stofna nýjan háttsettan samvinnuhóp um borgaralegt öryggi. Hingað til hefur lítið sem ekkert verið fjallað um þetta framtak en það ætti hins vegar að vera á allra vitorði þar sem áherslur í „Haga ferlinu“ eru mikilvægar fyrir alla íbúa Norðurlandanna og þá sem heimsækja löndin. Tilgangur Haga samvinnunnar snýr að því að öll Norðurlöndin eigi að hjálpast að til að koma í veg fyrir og takast á við náttúruhamfarir, slys og aðrar hættur sem tengast ekki beint hernaði eða stríði. Norræn samvinna af þessu tagi ætti að auka öryggi allra, spara umtalsverða fjármuni og gera Norðurlöndunum kleift að sýna fram á að slík samvinna getur virkað.

En hverju hefur þessi samvinna í raun skilað á þessum fimm árum? Í nýrri rannsókn sem gefin er út af Rannsóknasetri um smáríki við Háskóla Íslands (aðgengileg á ams.hi.is) benda Alyson Bailes (Háskóli Íslands) og Carolina Sandö (Swedish Defence Research Agency (FOI)) á ýmsar takmarkanir, veikleika og styrkleika slíkrar samvinnu. Bailes og Sandö færa rök fyrir því að nauðsynlegt sé að huga nánar að norrænni forgangsröðun og hindrunum sem standa í veginum og jafnframt að vinna betur að öðrum sviðum utan Haga samvinnunnar, eins og til dæmis varðandi samfélagslegt öryggi.

Á þessum fundi verður farið yfir rannsókn Bailes og Sandö, rætt um málið frá ólíkum sjónarhornum og einnig fjallað um stórt norrænt verkefni á þessu sviði sem íslensk verkefnisstjórn leiðir.

Fundarstjóri: Maria Strömvik, lektor í stjórnmálafræði og aðstoðarforstöðumaður Evrópufræðasetursins við Háskólann í Lundi. Maria starfar nú sem gestakennari við Stjórnmálafræðideild Háskóla Íslands.

Fundurinn fer fram á ensku. Allir velkomnir. Boðið verður upp á kaffiveitingar.

Hér má nálgast dagskrá málstofunnar.

Alþjóðamálastofnun á Facebook: www.facebook.com/althjodamalastofnun