Opinn fundur þriðjudaginn 13. maí: Þjóðernishyggja, sjálfsmyndir og Evrópusambandið

Þriðjudagurinn 13. maí kl. 12:00-13:30 í Norræna húsinu

 Þjóðernishyggja, sjálfsmyndir og Evrópusambandið

Opinn fundur á vegum Alþjóðamálastofnunar Háskóla Íslands og Evrópustofu í samvinnu við námsbraut í þjóðfræði og safnafræði við Háskóla Íslands.

Fjallað verður um hlutverk þjóðernishyggju, sjálfsmynda og menningararfs í tengslum við viðhorf til Evrópusamrunans. Rætt verður um þjóðmenningu og sjálfstæðishreyfingar í Evrópu í kjölfar efnahagsþrenginga síðustu ára og umræðan sett í samhengi við andstöðuna við Evrópusambandið. Tekin verða dæmi frá Hollandi, Íslandi og Skotlandi.

Þjóðvæðing Evrópu? Af nýlegum uppgangi þjóðerniskenndar í Evrópu

Í erindinu verður fjallað um það sem nefnt hefur verið enduruppgötvun hins þjóðlega“ um gervalla Evrópu, það er hvernig öllu sem talið er vera dæmigert“ hollenskt, danskt, enskt, spænskt, íslenskt og svo framvegis er haldið á lofti, vegsamað og gert út það í auglýsingum og fjölmiðlum. Útgangspunkturinn er nýleg gagnrýni Sameinuðu þjóðanna á hina dæmigerðu“ hollensku jólahefð um heilagan Nikulás (og þræl hans, Svarta Pétur) og þær deilur sem spunnist hafa í kjölfarið.

Herman Roodenburg er prófessor í þjóðfræði við Vrije Universiteit í Amsterdam og rannsakandi hjá Meertens Instituut.

——————–

Ísland í ljósi popúlískrar andstöðu við ESB

Fylgi flokka sem oftast eru kenndir við „popúlisma“ hefur farið vaxandi í Evrópu á undanförnum árum, en eitt af sameiginlegum stefnumálum þeirra er hörð andstaða við ESB. Í erindinu verður fjallað um spurninguna hvort andstaðan við inngöngu Íslands í ESB sé að einhverju leyti af svipuðum meiði, eða hvort hún er sér-íslenskt fyrirbæri.

Guðmundur Hálfdanarson er prófessor við Sagnfræði- og heimspekideild Háskóla Íslands.

——————-

Hvar á Skotland heima? Þjóðaratkvæðagreiðslan um sjálfstæði Skotlands og tengslin við Evrópu

Þann 18. september verður kosið um sjálfstæði Skotlands. Það er áhugavert að skoða Skotland í tengslum við þróunina í Evrópu um þessar mundir þegar kemur að þjóðernishyggju, þar sem eitt af markmiðum sjálfstæðishreyfingarinnar er að Skotland tengist Evrópu sterkari böndum, sérstaklega hvað varðar sjálfsmynd þess sem smáríki.

Alyson Bailes er aðjúnkt við Stjórnmálafræðideild Háskóla Íslands og starfar með hugveitunni Scottish Global Forum.

——————

Fundarstjóri er Valdimar Tr. Hafstein, dósent í þjóðfræði við Háskóla Íslands.

Fundirnir fara fram á ensku. Allir velkomnir.
The seminars will take place in English and are open to the public.