Smáríki og krísan á evrusvæðinu

Föstudaginn 12. apríl síðast liðinn hélt Peadar Kirby, prófessor emeritus í alþjóðastjórnmálum og opinberri stjórnsýslu við Limerick háskóla á Írlandi og gestaprófessor við Stjórnmálafræðideild Háskóla Íslands, erindi á opnum fundi Alþjóðamálastofnunar um smáríki og krísuna á evrusvæðinu. Nýlegt efnahagsáfall á Kýpur hefur orðið til þess að enn og aftur eru stjórnvöld í Evrópu gagnrýnd fyrir að auka vandann frekar en að leysa hann. Í þessum fyrirlestri var farið yfir þróun mála á Írlandi undanfarið, en margir líta svo á að þar hafi gengið vel að leysa úr þeim vanda sem upp kom í kjölfar efnahagshremminga síðustu ára. Kirby fjallaði um hvernig vandinn var skilgreindur og hvaða leiðir voru valdar til að leysa hann. Þá var skoðað að hvaða marki þessar leiðir leystu úr þeirri stöðu sem upp kom í kjölfar krísunnar, með því að nota Írland sem dæmi. Í fyrirlestrinum var einnig farið yfir fjármála- og bankakrísuna almennt, efnhagslægðina í víðari skilningi og félagslegar afleiðingar hennar. Að lokum voru niðurstöður tengdar Írlandi ræddar í samhengi við vandann á evrusvæðinu og á Íslandi.