Leiklist stjórnmálanna – Alþjóðamálastofnun og EDDA – öndvegissetur

Alþjóðamálastofnun Háskóla Íslands og EDDA – öndvegissetur kynna

Leiklist stjórnmálanna 

Miðvikudaginn
18.maí frá kl. 12.00 til 13.15 í stofu 101 í Odda

Oft er talað um stjórnmálin sem leiksvið og um stjórnmálamenn sem leikara, en allt frá fornöld hafa leikrænir tilburðir stjórnmálamanna verið fræðimönnum umhugsunarefni. Spannar þessi leiklist stjórnmálanna vítt svið sem nær allt frá lýðskrumi og ímyndarsköpun til dramatískra tilburða stjórnmálaleiðtoga til að höfða til almennings á ögurstund. Á síðustu áratugum hafa komið fram aðsópsmiklir stjórnmálamenn sem sumir hafa átt að baki feril sem leikarar, s.s. Ronald Reagan, fyrrverand forseti Bandaríkjanna og Arnold Schwarzenegger, fyrrverandi ríkisstjóri Kaliforníu. Aðrir hafa hefðbundnari bakgrunn en nýta sér tæki leiklistarinnar. Núverandi borgarstjóri Reykjavíkur, Jón Gnarr, hefur jafnvel gengið svo langt að beita markvisst aðferðum trúðsins. Nýrri andófshreyfingar nýta sér einnig óspart aðferðir leikhússins. Þannig bendir ýmislegt til þess að í pólitískum avant garde hreyfingum samtímans séu stjórnmál og leiklist eða leikrænar aðferðir að renna saman í eitt. Þetta gefur svo sannarlega tilefni til fræðilegrar umræðu. Frummælendur á þessum hádegisfundi munu því velta fyrir sér hinu leikræna eðli stjórnmála frá afturhaldi til byltingarhreyfinga.

 Sigridur_Lara_Olafur_Þordur_Sigridur_Þorgeirs

 

 

 

 

 

Frummælendur fundarins eru þrír: Sigríður Þorgeirsdóttir, heimspekingur, en hún mun fjalla um leiklist stjórnmálanna og avant garde pólitískar hreyfingar. Stjórnmálafræðingurinn Ólafur Þ. Harðarson mun síðan tala um leikræna tilburði stjórnmálamanna og beitingu þeirra í kosningabaráttum. Að endingu mun Sigríður Lára Sigurjónsdóttir, bókmenntafræðingur, fjalla um kosningabaráttu Besta flokksins sem pólitískt leikhús.

 

Öll velkomin!